Fascinatin plaes-names

Whin I wis aboot fifteen I göd on a scöl cruise ta Bergen, Oslo, Copenhagen an Hamburg.  Hit wis a winderfil experience an I wis parteeclarly taen wi Bergen, writes Christine de Luca.

Comin fae Waas, wi hits shaltered voe, we hed links wi Norski fishermen fae dat area; an, wi mi faider able ta spaek Norwegian, a braa twartree o dem wir wint ta come alang aboot da nicht.  (I mind eence een o dem browt a chunk o a whaal – I can still see hit, luikin laek raa but sturkened liver, sittin apö da table as mam tried ta wirk oot foo best ta cook hit.  I digress.)

Whin I wan ta Bergen yun time I seemed ta hae a peerie epiphany fur, no onnly did I fin mesel smilin at lasses at kinda hed wir laekly, but I fan da street names fascinatin.  Nae doot mony Shetlanders is felt da sam.

Advertisement6 of 10

Dis een, Nygårdsgaten, stack i mi memory fur at laest half a century.  Sae, whin I göd back ta Bergen, mony a year later, I sowt him oot an took a photo.  Da raeson dis strack me wis da similarity ta Neigarth, da croft across da burn fae Orgill in Vidlin whaar mi faider wis boarn.  (Da meanin is da ‘new enclosures’: Stewart J, p107.)  An while we widda said ‘Da gaet ta Neigart’, here it wis compoundit tae Nygårdsgaten.

An I fan some idder street signs dat mindit me o Waas, whaar I was browt up.

‘Da Finnigart gaet’.  Finnigart(h) in Mid Waas is a lovely spot, an reputedly linkit ta da Finns – wi dir magic pooers (Stewart, J p108).

‘Spurries’ in Waas aye seemed a odd name.  But dan here wis ‘Da Spurries gaet’!  Except hit wis spelt Sparres, maist laekly derived fae ‘sperra’ a spar o driftwid (Stewart, J p83).  Dat maks sense, fur ‘Sparrowayre’ in Waas – a göd plaes ta lay up driftwid – is clos by.

Help keep Shetland’s news open to everyone

Good local journalism takes time, care and people on the ground. Membership helps us keep reporting the stories that matter to Shetland — and keep them free for everyone to read. Members get a weekly newsletter created especially for them, local ads only, and can bookmark stories and join the conversation in the comments.

Already a member? Sign in.

£3 per month Billed on or shortly after the 24th of each month. Cancel anytime. £5 per month Billed on or shortly after the 24th of each month. Cancel anytime. £10 per month Billed on or shortly after the 24th of each month. Cancel anytime. Choose another amount Explore all membership options. Choose between monthly, quarterly, annual or one-off payments.

Continue Back to article

 

Dat maks me tink o da name ‘Waas’.  While I man commend whaivver managed ta gyet some fine rodd-signs up wi da derivation o da plaes-names shaan, Waas is no een o dem, an shurly hit man be een o da mosst misleadin corruptions.  Hit hes naethin ta dö wi steyn daeks.  Ivery time I come inta Waas an see da rodd-sign ‘Walls’, mi blöd pressure rises!   Whit wye is hit dat we hae ta pit up wi aa da Gaelic signage in Edinburgh whaar I bide an yet, whin I come haem, dis plaes-name Waas –derived fae Vágar, meanin bays (Jakobsen, J p112) – is nivver bön replaced?  Maps is digitised noo – nae engravin needit – an I tink da Royal Mail sud jöst be telt ta update dir database, an da Coonsil ta mak a new rodd-sign.

Advertisement7 of 10

But I sud add dat hit’s bön a delicht ta drive some Norski freends aroond da Wast Side, pooin in at dir request ta tak photos o rodd-signs, even if dey ir kinda anglicised: Hestinsetter, Burrafirth, Gruting, Selivoe  …

Notes:
Stewart, J Shetland Place Names, Shetland Library and Museum, Lerwick, 1987
Jakobsen, J The Place-Names of Shetland, Davd Nutt, London, 1936